A miña nai na praia, tarde turba

de ondas a ferver.

A miña nai quebrada, figura de latón

contra os muros do mar. Que non se entende

a música do tempo, onde estarei

cando o meu fillo poña neste verso

aquela tarde cova, o vento escuro

no terror da luz cóncava. Os avós

cantaban por enriba do balbordo

da escuma. Mar adentro

a perderse nun erro da memoria.

A miña nai, sen cabo, sen peirao,

regresa aqui setenta anos despois

e permanece tráxica

fronte aos muros do mar.

***

xosé maria álvarez cáccamo

vigo (galiza), 1950

*

Amor é un extravío de galernas,

unha agulla espiral de materias que ferven.

Amor foi chegar ti subitamente

ao calexón de escoura

por onde eu pervagaba

levado polo vento de pés fríos.

Pero tamén amor

é o vaso de auga rosa

que traes para curarme de aflicción,

raiña do quinteiro da alegria.

***

xosé maría álvarez cáccamo

vigo, 1950

************************

Eu andaba na procura dunha forma quecontivese no seu inte-

                rior o nome completo da forma,

un froito que estalase no momento de ser tocado para que

                nas mans ficase latendo o nome do froito,

un beixo para ser ocupado desde o princípio de abril até

                morrer.

Que na hora dos lábios da primeira palabra

o meu nome de animal deserto comezase a pronunciar un

                nome para sempre.

Pero eu pensaba que un beixo era fonte perpétua,

que entrar nun corpo era morrer e regresar en lume branco

definitivamente.

***

Xosé María Álvarez Cáccamo (1950)

Vigo - Galiza

***********************************************

Foron ellas, as aves de marzo,

As que viñan anunciando con velocidade de motor ou asteroide cego

A fusión dos grandes xelos que destilan sangue de navalla,

As que avisaron da cor brava dos campos e da tenra carícia das marés, lábios de estanque.

Elas escribiron o teu nome na memoria

Dunha tarde azul de marzo mentres eu vivia

Recén vestido de espera para a festa dos ar.

E alguén pasou repetindo un nome, o teu de ave senlleira,

Muller inevitábel, luz que danza,

Entón viñeche ti a perguntar se para sempre,

Se para sempre era,

Era este amor revelado nos circuitos migratorios

Do último dia de inverno.

***

Xosé Maria Álvarez Cáccamo (1950)

Vigo - Galiza

*****************************************

As aves

Foram elas, as aves de março,

as que vinham anunciando com velocidade de motor ou asteróide cego

a fusão dos grandes gelos que destilam sangue de navalha,

as que avisaram da cor brava dos campos e da terna

carícia das marés, lábios de estanque.

Elas escreveram o teu nome na memória

duma tarde azul de março enquanto eu vivia

recém vestido de espera para a festa do ar.

E alguém passou repetindo um nome, o teu de ave singular,

mulher inevitável, luz que dança.

Então vieste tu pergungar se para sempre,

se para sempre era,

era este amor revelado nos circuitos migratorios

do último dia de inverno.

[trad: cas]